7 қаңтарда Чилидің оңтүстігінде орналасқан Чильян қаласынан 22 жастағы Пабло Ромеро Чилидің ең ірі TVN телеарнасында көрсетілетін танымал «My Name Is» шоуының жартылай финалына сәтті өтті. Пабло қазақстандық әнші Димаш Құдайбергеннің бейнесінде «Кiм Екен» композициясын орындады.

Жас орындаушының жетістікке жету жолы оңай болған жоқ. Ол алғаш рет жергілікті байқауда Димаштың образымен шығып, екінші орынға ие болды. Кейінірек Лос-Анджелес қаласында өткен имитаторлардың шоуында өнер көрсетіп, тәжірибелі әртістермен бәсекелесіп, үшінші орынды жеңіп алды. Дәл сол кезде оның талантын Димаштың Dears деп аталатын жанкүйерлері байқайды.

Жартылай финалда Пабло тек жергілікті жанкүйерлерден ғана емес, сонымен бірге әлемнің түкпір-түкпіріндегі Dears-тан да қолдау тапты.

«Мен Димаштың өнерін 2018 жылы интернеттен іздеп, өзім үшін жаңалық ашқандай болдым. Оның даусы бұрын соңды ешбір жерден кездестірмеген ерекше дауыс. «Менің есімім» шоуына қатысуыма әсіресе, Димаштың шығармашылығы түрткі болды.

Басында сахнаға шығудан қорыққандықтан өнер көрсетуге қобалжыдым, бірақ соңында ол қорқынышымды да жеңе алдым. Оған қоса, мені қолдауға әлемнің түкпір-түкпірінен Dears келді. Бұл маған үлкен қуаныш сыйлап, мені шабыттандырды.

Сөзсіз мен өзімді жеңімпаз сезінемін, өйткені мен Димаштың өнерін өзім елестеткеннен де жоғары деңгейде алып шықтым. Мен бұл істі Димашқа және оның мәдениетіне деген үлкен құрметтің арқасында жасап жатырмын».