18 мамыр күні гуманитарлық миссиямен Бангладешке келген БҰҰ-ның көші-қон мәселелері жөніндегі Жаһандық ізгі ниет елшісі Димаш Құдайберген Бангладештегі мәжбүрлі қоныс аударушылар лагеріне сапар шекті.
Кокс-Базар аумағында өз үйлерін тастап, мәжбүрлі түрде қоныс аударған миллионнан астам адам тұрады. Бұл лагерьлер көшкін, су тасқыны, өрт және циклон секілді табиғи апат қаупі жоғары аймақтарда орналасқан. Адамдар қауіпсіздігіне елеулі қатер төндіретін тығыз, әлсіз әрі жиі жөндеуді қажет ететін жерлерде өмір сүруге мәжбүр.

БҰҰ-ның көші-қон жөніндегі агенттігі (IOM) Shelter/CCCM Sector тұрғын үймен қамтамасыз ету секторы және Бангладеш үкіметімен бірлесіп, 17 лагерьде баспана мен алғашқы қажетті тұрмыстық заттарды жеткізу бағытындағы жұмыстарды атқарып отыр.

Димаш делегация құрамында лагерьдегі тұрғын үй тарату пунктіне барып, мәжбүрлі қоныс аударушыларды баспанамен және алғашқы қажетті заттармен қамтамасыз етуге бағытталған іс-шаралармен танысты. Сонымен қатар орталықтың мамандары тұрғындарды үй құрылысы және жөндеу дағдыларына үйрету жұмыстарын да жүргізуде.

Мәдени жады орталығында Димаш жергілікті қауымдастықтардың өнер арқылы әлеуметтік әл-ауқатты нығайту және ұжымдық бірегейлікті сақтау мақсатында жүзеге асырып жатқан бастамаларын зерделеді. Бұл жерде туған жерінен айырылған адамдар өз халқының тарихымен бөлісіп, мәдени жадты сақтау үшін ана тілін, музыкасын үйреніп, ұлттық дәстүрлерін жаңғыртуға барынша күш салады.

Сапар барысында Димаш жергілікті музыканттармен және ұлттық музыкалық аспаптарды жасайтын шеберлермен жүздесті. Жас орындаушылар мандолина, скрипка, барабан және басқа да аспаптарда ойнап, жаңа туындылар жазумен қатар, өз қауымдастығының мәдени дәстүрлерін сақтауға үлес қосуда.

Қонақжайлық белгісі ретінде музыканттар Димашқа жергілікті шеберлер қолынан шыққан қолдан жасалған мандолинаны сыйға тартты.