Димаш Құдайбергеннің шығармашылығына деген қызығушылық француздық жанкүйерлер Надин Пьерро мен Садрин Байи үшін Қазақстанмен жақынырақ танысуға, сондай-ақ екі ел арасындағы мәдени және білім беру байланыстарын дамытуға негіз болды.

Француздық фан-қауымдастықтың өкілдері Қазақстанға бірнеше рет сапарлап келген болатын. Сапарлары барысында олар елдің тарихы, мәдениеті мен білім беру жүйесімен танысып, Қазақстан мен Франция арасындағы гуманитарлық ынтымақтастықты нығайтуға бағытталған түрлі бастамаларға қатысып келеді.

21 тамызда Надин Пьерро мен Садрин Байи Астанаға арнайы келіп, №16 жалпы білім беретін мектепте Төлеген Айбергенов атындағы оқу кабинетінің салтанатты ашылу рәсіміне қатысқан еді. Іс-шараға ақынның қызы Айнар Төлегенова және Қазақстан зиялы қауымының өкілдері қатысты.

Сапар аясында француздық қонақтарға Димаш Құдайберген атындағы вокал кабинеті де таныстырылды. Аталған кабинетте вокал бойынша оқу сабақтары өткізіледі.

Француз тілін Қазақстанда оқытуға қолдау көрсету де олардың қызметінің маңызды бағыттарының біріне айналды. Тамыз айында Парижден Алматыға оқушылар мен мұғалімдерге арналған француз тіліндегі 100-ден астам кітап жеткізілді.

Бұл бастама Надин Пьерроның өткен жылы Қазақстанға жасаған сапарынан кейін қолға алынған. Сапар барысында ол Алматы қаласындағы І. Есенберлин атындағы №25 гимназияның француз тілі пәнінің мұғалімі, Қазақстандағы француз тілі оқытушылары қауымдастығының президенті Айгүл Досжановамен танысқан. Дәл осы кездесуден кейін Қазақстанның білім беру ұйымдарына француз әдебиетін табыстау туралы идея туындаған.

Франциядан жеткізілген кітаптар топтамасында балаларға арналған оқу-әдістемелік басылымдар, ертегілер, Франция тарихы мен мәдениетіне арналған кітаптар қамтылған. Сонымен қатар қазақ авторларының француз тіліне аударылған шығармалары да топтаманың ерекше құнды бөлігін құрайды.

Бұл бастаманы жүзеге асыруға Францияда қазақ мәдениетін насихаттаумен айналысатын ALEM қауымдастығы мен Қазақстан Республикасының Франциядағы Елшілігі қолдау көрсетті. Кітаптардың бір бөлігі №25 гимназияның кітапханасында қалдырылса, өзге басылымдарды еліміздің өңірлеріндегі білім беру ұйымдарына табыстау жоспарланып отыр. Әдебиеттердің бір бөлігі биылдан бастап француз тілін оқыту қолға алынатын Ақтөбедегі Назарбаев Зияткерлік мектебіне жіберіледі.

Надин Пьерроның айтуынша, бастаманы одан әрі жалғастырып, француз әдебиетін Қазақстан мектептеріне табыстау географиясын кеңейту көзделіп отыр.

Сонымен қатар тараптар ынтымақтастықты дамытудың өзге де бағыттарын қарастыруда. Атап айтқанда, қазақстандық мұғалімдердің біліктілігін арттыру және кәсіби білімін жетілдіру мақсатында Францияға баруына мүмкіндік жасау мәселесі де талқылануда.