Аргентина, Уругвай, Венесуэла және Мексика елдеріндегі Димаштың Together for Dimash халықаралық фан-қоғамдастығы Аргентинаның Патагония өңіріндегі орман алқаптарын қалпына келтіруге бағытталған экологиялық бастамаға кезекті рет қатысты.

Қауымдастық администраторларының мәліметінше, қайырымдылық акциясы аясында Димаштың жанкүйерлері Friends of Patagonia қауымдастығына 46 көшет табыс еткен. Жас ағаштар 2009 жылғы ірі орман өрттерінен зардап шеккен жаңа аумақта отырғызылатын болады. Өңірде табиғи экожүйелерді қалпына келтіру жұмыстары соңғы 15 жыл бойы үздіксіз жүргізіліп келеді.

Қоғамдастық мүшелері жыл сайын жергілікті ағаш отырғызуды қолдап, қоршаған ортаны қорғауға өз үлестерін қосып келеді. Ұйымдастырушылардың айтуынша, биылғы акция Димаш Құдайбергенге арналып, өнерпаздың туған күніне орай символикалық сый ретінде ұсынылған.

Жанкүйерлер Димаштың бірлік, сүйіспеншілік пен табиғатқа құрмет құндылықтарын насихаттайтын үндеуінен шабыт алатындарын атап өтіп, барша ниет білдірушілерді осы игі бастамаға қосылуға шақырды.