1 мамыр күні Овьедода (Испания) өткен Liga de las Estrellas халықаралық турнирінде Димаш Құдайбергеннің музыкасына қойылған бағдарламамен өнер көрсеткен гимнаст Ициар Ордоньес Алонсо шығыршықпен орындалатын жаттығуда күміс медаль жеңіп алды. Сонымен қатар, спортшы бұған дейін де өзге халықаралық жарыстарда жүлдегер атанған болатын.

Турнир барысында гимнаст шығыршық, доп, лента және сойылдар арқылы төрт құралмен өнер көрсетті. Іс-шараға ең мықты командалар қатысып, байқау нәтижелерін Испания ұлттық құрамасының өкілдері бақылап отырды.

Ициар Ордоньес Алонсо көркем гимнастика бойынша «La Corredoria» клубының атынан сынға түсіп, түрлі деңгейдегі жарыстарға тұрақты түрде қатысып отыратын спортшы. Оның ұлттық чемпионаттар, халықаралық турнирлер мен Испания еліндегі көркем гимнастиканың ең жоғары дивизионы саналатын Iberdrola испан лигасында спорттық тәжірибесі бар.

Ағымдағы маусымда спортшы шығыршықпен орындалатын бағдарламасын Димаш Құдайбергеннің орындауындағы SOS композициясымен қойды. Музыкалық сүйемелдеуді жаттықтырушы Ана Исабель Кортес Росес таңдаған. Ол аталған туындыны алғаш рет Валенсияда өткен байқау кезінде байқап, кейіннен жаттығудың көркемдік концепциясына барынша сәйкес келетін нұсқа ретінде Димаш орындаған үлгіні бекіткен.

Бұған дейін гимнаст 4 сәуір күні өткен Ourense A Provincia Termal атты 14-ші халықаралық турнирде де күміс жүлдегер атанған болатын.

Овьедо қалалық кеңесі мен Испания көркем гимнастика федерациясы жариялаған материалдарда Димаш Құдайбергеннің есімі аталып, оның YouTube-арнасына сілтеме беріп өткен. Сондай-ақ испандық бұқаралық ақпарат құралдарында жарық көрген сұхбатта музыка таңдаудың ерекшелігі мен тренердің Димаш шығармашылығымен танысу тарихы да баяндалған.