Димаш Құдайбергеннің халықаралық жанкүйерлер қауымдастығы тағы бір мәрте қайырымдылық бастамасы аясында бірігіп, 24 маусымда Венесуэлада болған жойқын жер сілкіністерінен зардап шеккен тұрғындарға гуманитарлық көмек ұйымдастырды.

Dears For Venezuela бастамасы гуманитарлық дағдарысқа жедел үн қату мақсатында Димаштың Венесуэладағы ресми фан-клубының бастамасымен құрылды. Кейіннен бұл қайырымдылық акциясына Латын Америкасының жеті еліндегі Димаштың ресми фан-клубтары, сондай-ақ түрлі K-pop қауымдастықтарының өкілдері қосылды.

Жиналған қаражатқа дәрілік заттар, жеке гигиена құралдары, балаларға арналған қажетті тауарлар, ұзақ сақталатын азық-түлік өнімдері, ауыз су және өзге де күнделікті тұрмысқа қажетті заттар сатып алынды. Венесуэладағы ресми фан-клубтың еріктілері гуманитарлық көмекті ауруханаларға, қайырымдылық ұйымдарына және табиғи апаттан ең көп зардап шеккен отбасыларға жеткізуді ұйымдастырды.

Қазіргі уақытта Dears For Venezuela бастамасы өз қызметін жалғастырып, түрлі елдердегі Димаш Құдайбергеннің жанкүйерлерінің күш-жігерін біріктіру арқылы жер сілкінісінен зардап шеккен тұрғындарға қолдау көрсетуді жалғастыруда.