Мадридте Астана күніне және қазақтың ұлы ақыны Абайдың 180 жылдығына орай Қазақстанның Испаниядағы Елшілігі ұйымдастырған шара өтті. Мерекелік шараларға дипломатия, мәдениет ұйымдарының өкілдері және қазақстандық әнші Димаш Құдайбергеннің жанкүйерлері қатысты.

Әншінің Испаниядағы ресми фан-клубы мен «La Gran Voz Kazaja» қауымдастығы «Мәдениет пен ынтымақтастық диалогы» атты шара өткізді. Димаштың гуманистік ұстанымынан әсерленген жанкүйерлері оның атынан церебральды сал ауруы және басқа да қимыл, іс-әрекет жасаудан қиындығы бар балалар мен жасөспірімдерге білім беру және жан-жақты қолдау көрсетумен айналысатын Aenilce қорына 1200 еуро көлемінде қайырымдылық көмек көрсетті.

Іс-шараның ең қызықты сәттерінің бірі — фан-клуб мүшелері өздері модель болып, «Ak Kerbez» топтамасының әшекейлері мен киімдерін ұсынған сән көрсетілімі болды. Көрсетілім дизайнер Сандуғаш Сержанқызының қолдауымен дайындалды.

«Тұмар» фольклорлық ансамблінің, «Фараб» би тобының, қазақ мәдениетінің байлығын айшықтайтын “Арқайм” этно тобының өнерлері де қонақтардың көңілінен шықты.