Мексикадағы Димаштың жанкүйерлері креативті акциясы арқылы тағы да жергілікті бұқаралық ақпарат құралдарының назарын аударды. Lucha Libre-ге арналған арнайы іс-шара барысында жанкүйерлер Қазақстанның туын және DQ инициалдары бейнеленген маскаларды алып шығып, іс-шараға келушілерге Димаштың шығармашылығы мен оның алдағы DIMENSIONS туры туралы ақпарат берді.

Мексикалық Dears Димаштың шығармашылығын жаңа аудиторияға таныстыру үшін түрлі мүмкіндіктерді пайдалануды жалғастыруда. Бұл жолы мексикалық фан-клуб мүшелері Мексиканың ең танымал мәдени құбылыстарының бірі саналатын Lucha Libre-ге арналған арнайы іс-шараға қатысты.

Lucha Libre мексикалық мәдениетте айрықша орын алады. Кәсіби күрестің бұл түрі жарқын маскаларымен, әсерлі акробатикалық қойылымдарымен және ұрпақтан ұрпаққа жалғасып келе жатқан отбасылық дәстүрлерімен ерекшеленеді. 2018 жылы мексикалық Lucha Libre Мехико қаласының материалдық емес мәдени мұрасы ретінде танылды.

Мексикалық Lucha Libre-нің тарихы мен мәдени бастауларына арналған іс-шара барысында Димаштың жанкүйерлері ерекше атрибутикасымен көпшіліктің назарын аударды. Олар Қазақстанның туын және өнер иесіне арналған DQ инициалдары бейнеленген маскаларды алып келді.

Мексикалық Dears-тің креативті акциясы жергілікті БАҚ-тың назарын аударды. Акцияға қатысушылар түскен бейнежазба Мексикадағы танымал ойын-сауық медиаресурстарының бірі — Televisa Espectáculos-тың әлеуметтік желідегі парақшаларында жарияланды. Сонымен қатар акция телевизиялық эфирде де көрсетілді. Клуб мүшелерінің мәліметінше, акция туралы арнайы сюжет TV Azteca медиатобына қарасты жаңалықтар телеарнасы ADN 40 эфирінен көрсетілген.

Димаштың Мексикадағы алдағы концерті оның DIMENSIONS әлемдік турының бір бөлігі болып саналады.