Латын Америкасы елдеріндегі Димаш Құдайберген шығармашылығының жанкүйерлері «Unforgettable Day – Faithful Love, One Voice, One Dear Family» атты музыкалық жобаларын ұсынды. Жобаның жазбасына Бразилия, Аргентина, Боливия, Уругвай, Коста-Рика, Мексика, Чили, Эквадор және Сальвадор елдерінен Dears қауымдастығының өкілдері қатысты.

Жобаның айрықша ерекшелігі – әннің қазақ тілінде орындалуы. Бұл Димаштың халықаралық аудиториясының Қазақстан мәдениетіне деген тұрақты қызығушылығын айғақтайды. Әлемнің түкпір-түкпіріндегі жанкүйерлер қазақ тілін меңгеруге ұмтылып, ұлттық музыкалық дәстүрмен танысып қана қоймай, қазақ халық музыкалық аспаптарында орындауды да игеруге талпынып келеді.

«Аталған жоба әртүрлі мемлекеттер мен құрлықтарда өмір сүретін, алайда өнерпаздың шығармашылығына деген ортақ сүйіспеншілік біріктірген жанкүйерлерді тоғыстырды. Таңдалған музыкалық туынды адал махаббаттың – шекарасыз сүйіспеншіліктің символы ретінде халықаралық Dears қауымдастығының философиясын айқын көрсетеді. Бұл қауымдастық үшін арақашықтық ұғымы ешқандай мәнге ие емес», – деп атап өтті жоба ұйымдастырушылары.