Димаш Құдайбергеннің поляк жанкүйерлер клубы әншінің 32 жасқа толуына орай кең ауқымды әрі поляк халқына тән ерекше шығармашылық фантазиямен «TAU ISHINDE & DEARS» атты музыкалық тарту дайындады.

Димаштың туған күні қарсаңында осы мерекелік жобаға арнайы әзірленген бейнероликтің премьерасы өтті.

Аталған жоба эмоция мен қуанышқа және әлемнің түкпір-түкпіріндегі тыңдармандарын өзінің талантымен әрі музыкалық харизмасымен шабыттандырып жүрген өнер иесіне деген зор сүйіспеншілікке толы болды.

«Біз барлық Dears қауымын осы ерекше тосынсыйға қатысуға шақырдық. DiVoices хорымен бірлесе отырып, негізгі идеясы “Туған күнге кеттік!” деген ұранға құрылған көңілді бейнеролик дайындадық.

Дайындық жұмыстары жарқын, креативті, кей тұста әсерлі әрі ең бастысы – ерекше жылылық пен зор ықыласқа толы болды. Әрбір қатысушы бұл жобаға жүрегінің бір бөлшегін арнады.

Бұл жолы біз ерекше шешім қабылдап, қазақ әнін орындадық. Осы арқылы мәдениеттерімізді символикалық тұрғыдан тоғыстырып, Димаштың туған жеріне деген құрметімізді білдіруді мақсат еттік.

Әсіресе, шығарманы төрт дауысты хор үлгісінде орындағанымыз біз үшін үлкен жетістік болды. Бұл тек музыкалық тәжірибе ғана емес, сонымен қатар тіл мен мемлекетке шекара қоймайтын музыка өнерінің құдіретін бірге сезінуге мүмкіндік берген тамаша шығармашылық сапарға айналды.

Қорытынды нәтиже біз үшін жай ғана бейнероликтен әлдеқайда маңызды дүние болды. Бұл – поляктық Dears қауымының сүйікті өнер иесіне арналған шынайы музыкалық сыйы. Біздің тосынсыйымыз Димаштың жүзіне күлкі сыйлап, оған деген ықыласымыз бен сүйіспеншілігімізді сезіндіре алады деп үміттенеміз. Өйткені музыка, расында да, араларын мыңдаған шақырым бөліп тұрса да, адамдарды жақындастыра алады», – деп бөлісті Dears сүйікті өнер иесіне арналған тосынсыйы жайында.